ദോഹ:സഹനത്തിന്റെ സഹാനുഭൂതിയുടെ സന്തോഷത്തിന്റെ സൗഹാര്ദ്ദത്തിന്റെ ആഘോഷമാണ് പെരുന്നാള്.കരുണയുടെയും കണ്ണിചേര്ക്കലിന്റേയും ഗുണകാംക്ഷയുടെയും മഹിതമായ പാഠമുള്കൊള്ളുന്ന സുദിനമാണ് പെരുന്നാള്.നിശ്ചയ ദാര്ഢ്യത്തോടെ ദൈവ നിശ്ചയത്തെ നെഞ്ചേറ്റി സംസ്കരണത്തിന് വിധേയമായി പുതിയ പുലരിയില് ദൈവത്തെ കീര്ത്തിച്ച് സായൂജ്യമടയുന്ന സുദിനം.സഹജരെ കുറിച്ചോര്ക്കുന്ന അവരുടെ സുഖ ദുഃഖങ്ങളില് പങ്കു ചേരുന്ന ഉന്നതമായ സംസ്കാരം പ്രോജ്ജ്വലമാകുന്ന സുദിനം.
ഒരു ദിവസത്തെ ജീവിത വിഭവങ്ങള്ക്ക് പ്രാപ്തിയുള്ള ഓരോ വിശ്വാസിയും പാവപ്പെട്ടവരുടെയും അഗതികളുടെയും അശരണരുടെയും കാര്യത്തില് ചിന്തിക്കാനും പ്രവര്ത്തിക്കാനും ഫിത്വര് സകാത്ത് എന്ന കര്മ്മത്തിലൂടെ പ്രചോദനം ചെയ്യുന്ന മഹനീയമായ ദിനം.ഒരു സംസ്കാരത്തിന്റെ സംസ്കൃതിയുടെ സൗന്ദര്യത്തെ അതി മനോഹരമായി പ്രതിഫലിപ്പിക്കുന്ന ദിനം.ഖത്വീബ് ഓര്മ്മിപ്പിച്ചു.
ദോഹ സ്റ്റേഡിയം ഈദ് ഗാഹില് തിങ്ങി നിറഞ്ഞ സദസ്സിനെ സാക്ഷിയാക്കി പെരുന്നാള് ഖുതുബ നിര്വഹിക്കുകയായിരുന്നു ഇമാം.
പോരാട്ടങ്ങളുടെയും ഒപ്പം വിജയാരവത്തിന്റെ ചരിത്രമുള്ള റമദാനിന്റെ പരിസമാപ്തിയിലാണ് വിശ്വാസികള്.ഉപരോധങ്ങളും ഒപ്പം പ്രതിരോധങ്ങളും വീര ഗാഥകളും കൊണ്ട് ചരിത്രം സൃഷ്ടിച്ച റമദാനില് പഴയകാല ചരിത്ര ദുഃഖ സത്യങ്ങളെ ഓര്മ്മിപ്പിക്കും വിധമുള്ള സംഭവങ്ങളുടെ ആവര്ത്തനങ്ങള്ക്ക് ഈ കൊച്ചു രാജ്യം സാക്ഷിയായി.ഒരു വര്ഷം കഴിഞ്ഞിട്ടും അവസാനിക്കാത്ത അയല് രാജ്യങ്ങളുടെ ഉപരോധത്തെ സര്ഗാത്മകമായി അതിജീവിക്കാനും അതിജയിക്കാനും നാഥന്റെ അനുഗ്രഹത്താല് സാധിച്ചതിലുള്ള സന്തോഷവും ഈ പെരുന്നാല് ദിനത്തില് പങ്കുവെക്കാം.ദൈവത്തില് ഭരമേല്പ്പിച്ച് പ്രാര്ഥനാ നിര്ഭരമായ സമര്പ്പണ മനസ്സോടെ ദൈവത്തെ പ്രകീര്ത്തിക്കാം.ഒരു മാസത്തെ ശിക്ഷണ കാലത്ത് കാച്ചിയെടുത്ത വിശ്വാസ ദാര്ഢ്യത്തിന്റെ പരിപ്രേക്ഷ്യത്തില് നിന്നു കൊണ്ട് രൂപപ്പെടുത്തിയ വിഭാവനകളെ നാഥന് വിജയിപ്പിച്ചു തരുമാറാകട്ടെ.ഹൃദയാവര്ജ്ജകമായ പ്രാര്ഥനയോടെ വളരെ സംക്ഷിപ്തമായി ഇമാം വിശദീകരിച്ചു.
കാലത്ത് 04.58 നായിരുന്നു പെരുന്നാള് നമസ്കാരം ആരംഭിച്ചത്.വിവിധ ദേശ ഭാഷക്കാര് തിങ്ങി നിറഞ്ഞ ഈദ് ഗാഹില് മലയാള പരിഭാഷ നിര്വഹിക്കുന്ന വിവരം മുന് കൂട്ടി അറിയിച്ചിട്ടുണ്ടായിരുന്നു.സ്ത്രീകള്ക്ക് പ്രത്യേക സൗകര്യവും ഖത്തര് മതകാര്യ വകുപ്പ് ഒരുക്കിയിരുന്നു.
അറബി ഖുത്വുബയുടെ വിവര്ത്തനം പി.പി.എ. റഹീം നിര്വഹിച്ചു.
0 comments:
Post a Comment
Note: Only a member of this blog may post a comment.